ಎರಡು ಸಾಲುಗಳು

ಆ ಎರಡು ಸಾಲುಗಳು
ಎಷ್ಟು ನೆನೆದರು ನೆನಪಿಗೆ ಬರುತ್ತಿಲ್ಲ
ಯಾರು ಎಲ್ಲಿಗೆ ಕರೆದೊದರೊ?
ಎಲ್ಲಿ ಕಷ್ಟಗಳುನುಭವಿಸುತ್ತಿವೆಯೋ?
ಯಾವ ಧುರುಳರಡಿಯಲಿ ಸಿಲುಕಿ ನರಳುತ್ತಿವೆಯೋ? ಅರಿಯೆ…

ಕರೆದೊದರೊ, ಕದ್ದೊದರೋ,
ಒದ್ದೋದರೋ, ತುಳಿದೊದರೊ, ಗೊತ್ತಿಲ್ಲ.
ಆ ಸಾಲುಗಳ ಕಣ್ಮರೆಗೆ ಅಲ್ಲಿರುವ ದೊರೆಯೇ,
ಅವನ ಭಕ್ತರೇ ಕಾರಣ ಎಂಬ ಆ
ಹುಚ್ಚನ ಪಠಣ ಯಾರು ಕೇಳಿಯಾರು?
ಪೊಲೀಸರೂ, ಹುಚ್ಚರಾಗುವ ಬದಲು ಭಕ್ತರಾಗಿರುವುದನ್ನು
ಸಾರಿ ಸಾರಿ ಹೊಗಳಿದ ಯೋಗಿಯೊಬ್ಬ…

ಹೀಗಿರುವಾಗ, ಅಲ್ಲೆಲ್ಲೋ….
ಹುಣ್ಣಿಮೆ ಬೆಳಕ ಮರೆಯಲ್ಲಿ
ನಿಂತ ಪ್ರೀತಿ ಅತ್ತಿತ್ತ ನೋಡುತ್ತಾ,
ಕಣ್ಣು ಮಿಟಿಕಿಸುತ್ತ, ಪೊಲೀಸರ ಕಣ್ತಪ್ಪಿಸಿ,
ಆ ಎರಡು ಸಾಲುಗಳ ಹುಡುಕುತ್ತಿತ್ತು.

– ವಿಶ್ವಕೀರ್ತಿ

Advertisements

ನಾನು

ನಾನು
ಯಾವ ಧರ್ಮಕ್ಕೂ ಸೇರಿದವನಲ್ಲಾ;
ಎಲ್ಲಾ ಧರ್ಮಕ್ಕೂ ಸೇರಿದವನು

ನಾನು
ಯಾವ ಧರ್ಮದ ಪರವೂ ಇಲ್ಲಾ
ಎಲ್ಲಾ ಧರ್ಮದ ಜೀವದ ಪರ

ನಾನು
ಒಂದು ಧರ್ಮವೇ;
ಒಂದು ಗ್ರಂಥವೇ;
ಒಂದು ಭಾಷೆಯೇ;
ಒಬ್ಬ ದೊರೆಯೇ;
ಶ್ರೇಷ್ಠವೆಂಬ ಸಟೆಯನ್ನು
ಒಪ್ಪುವುದಿಲ್ಲಾ

ನಾನು
ಬ್ರಾಹ್ಮಣ್ಯವೇ ಯುಕ್ತಿ;
ಕ್ಷತ್ರಿಯವೇ ಶಕ್ತಿ;
ವೈಶ್ಯವೇ ವ್ಯವಹಾರ;
ಶೂದ್ರವೇ ಸೇವೆ;
-ವೆಂಬ ನನ್ನೊಳಗಿನ ‘ವರ್ಣ’ರಂಜಿತ
‘ಮನು’ವನ್ನು ಕೊಂದಿದ್ದೇನೆ

ನಾನು
ರಾಮನನ್ನು ನಂಬುವುದಿಲ್ಲಾ;
ಅಲ್ಲಾಹುನನ್ನು ನಂಬುವುದಿಲ್ಲಾ;
ಏಸುನನ್ನು ನಂಬುವುದಿಲ್ಲಾ;
ನಂಬಿರುವುದು ಶರಣನಾದ
ಜಲಗಾರನನ್ನೇ; ಎಲ್ಲರೂ ಅವನೇ

ನಾನು
ಈ ದೇಶದಲ್ಲಿಲ್ಲಾ:
ಆ ದೇಶದಲ್ಲಿಲ್ಲಾ;
ಇರುವ ನೆಲವೆ ಒಂದು ರಾಷ್ಟ್ರ,
ನುಡಿವ ನುಡಿಯೇ ರಾಷ್ಟ್ರಭಾಷೆ,
ಹಾಡುವ ಹಾಡೇ ರಾಷ್ಟ್ರಗೀತೆ,
ಉಡುವ ಅಂಗಿಯೇ ರಾಷ್ಟ್ರಬಾವುಟ

ನಾನು
ಗುಡಿ, ಚರ್ಚು, ಮಸೀದಿಗಳಲಿಲ್ಲಾ;
ಪಾರ್ಲಿಮೆಂಟಿನಲ್ಲಿಲ್ಲಾ;
ಜ್ಞಾನಿಯಲ್ಲಾ, ಜವಾನನಲ್ಲಾ,
ರೈತನಲ್ಲಾ, ಸೈನಿಕನಲ್ಲಾ;
ಎಲ್ಲರೊಳಗಿರುವ ಬುದ್ಧ

ಇಂದು
ನಾನು
ಬದುಕಿಲ್ಲಾ;
ಬದುಕಿದ್ದರೆ, ಪ್ರೀತಿಯಲ್ಲಿ ಮಾತ್ರ
ಸತ್ತರೆ, ಭೂಮಿಯೇ ರಣರಂಗ

ಇಂತಿ ನಿಮ್ಮ ನಾನು

ವಿಶ್ವಕೀರ್ತಿ ಎಸ್.
19.07.2018

 

ಪ್ರೀತಿಯ ಬೆಳಕು

ಕಾರಣ ಹೇಳದೆ ಹೋದೆ
ಸ್ವಪ್ನದಿಂದ, ಎಲ್ಲಿ ಹುಡುಕಲಿ ನಿನ್ನ?
ನೂರೊಂದು ನೆನಪಿನ ಬುತ್ತಿ
ಕಟ್ಟಿ, ಅಳಿಸದೇ ಹೋದೆ ಏಕೆ?
ನಿನ್ನ ಪ್ರೀತಿಯ ಬಾಣ
ರಾಡಿಗೊಳಿಸಿತು ನನ್ನ ಮನದ
ಕಡಲ, ಕಾಡುವ ಕನಸು-ನೆನಪಿನೊಳಗೆ
ಬಂದಿಸಿ, ನೀ ಮಾತ್ರ ಕಾಣದ
ಚುಕ್ಕಿಯಾಗಿ ಹೊಳೆಯುತಿರುವೆ, ಇನ್ನು
ಪ್ರೀತಿಯ ಕಾರಾಗೃಹದಲ್ಲಿ ಬಂದಿ ನಾನು
ಕಳೆದ ‘ನೆನಪ’ ಬಯಸಲೋ?
ಬರುವ ‘ಸ್ವಪ್ನವ’ ಕಾಯಲೋ?
ಉತ್ತರವಿಲ್ಲದೆ, ಈ ‘ಪ್ರೀತಿ’ ಕಾಯುತಿದೆ
ನಿನಗಾಗಿ, ಎಲ್ಲಿ ಅದೃಶ್ಯವಾಗಿರುವೆ?
ರಾತ್ರಿ ಹಗಲೆನ್ನದೆ ಆಗಸವ
ದಿಟ್ಟಿಸಿರುವೆ, ಸಹಸ್ರ ಚುಕ್ಕಿಗಳ
ಮಾಯಾ ಮಂಟಪದಲ್ಲಿ, ಜೀವ
ತಳೆಯುವ ನಿನ್ನ ಪ್ರೀತಿಯ ಬೆಳಕಿಗೆ

-ವಿಶ್ವ ಕೀರ್ತಿ ಎಸ್
೨೩.೦೩.೨೦೧೮

 

ನೆನಪು

ಅಂದು,
ಆಡಿದೆವು ಜಗವಮರೆತಿ,
ಕಲಿತೆವು ಒಟ್ಟಿಗೂಡಿ,
ಹಂಚಿ ತಿಂದೆವು ಒಂದೇ ತಟ್ಟೆಯಲಿ,
ಕಾಲದ ಪ್ರಜ್ಞೆಯೇ ಇಲ್ಲದಂತೆ
ಹರಟೆಹೊಡೆದವು,
ದೊಡ್ಡವರ ಗೋಜಿಗೆ ಹೋಗದೆ
ಕುಣಿದ ಎಷ್ಟೋ ದಿನಗಳು.
ಸಮಯ ಬಂದಾಗ
ದುಃಖದಲ್ಲಿ ಒಂದಾಗಿ,
ನಗುವಲ್ಲಿ ಜೊತೆಯಾಗಿ
ಕಳೆದ ಆ ಸುಂದರ
ದಿನಗಳ ನೆನಪೇ…ಅಮರ.

-ವಿಶ್ವಕೀರ್ತಿ. ಎಸ್

ಕಾಯಿಸದಿರು ನನ್ನ

ಬಾಗಿಲ ಬಳಿ ಬಂದು ಬಡಿಯುತಿರುವೆ
ತೆರೆಯುವೆಯ ನಿನ್ನ ಎದೆಯ ಬಾಗಿಲ
ಅರಿಯದೆ ಬಂದ ನನಗೆ
ಸಿಗುವುದೆ ನಿನ್ನ ಪ್ರೀತಿಯ ಸ್ನೇಹ

ಕೈ ಮುಗಿದು ಕೇಳುವೆ
ಕನಸಾಗುವೆಯ ನನ್ನ ನೆನಪಿಗೆ
ಖಾಲಿ ಇರುವುದು ಜಾಗ
ಬರುವೆಯ ನನ್ನ ಹೃದಯಕೆ

ಕಾಯಿಸದಿರು ಹೆಚ್ಚು ಕಾಲ
ಮಾತೇ ನಿಲ್ಲುವುದು ನನಗೆ
ನೋಯಿಸದಿರು ನನ್ನ
ಹೃದಯದ ಬಡಿತವೆ ನಿಲ್ಲವುದು ಕೊನೆಗೆ

ಹೆಚ್ಚು ಸಮಯ ಬೇಡ
ಒಪ್ಪಿಕೊ ನನ್ನ ಪ್ರೀತಿಯ
ಒಲ್ಲೆಯೆಂದರೂ ಕಾಯುವೆ
ಬಾಗಿಲ ಬಳಿಯೇ ಜೀವನದುದ್ದಕ್ಕೂ


ವಿಶ್ವಕೀರ್ತಿ ಎಸ್