ನಾನು

ನಾನು
ಯಾವ ಧರ್ಮಕ್ಕೂ ಸೇರಿದವನಲ್ಲಾ;
ಎಲ್ಲಾ ಧರ್ಮಕ್ಕೂ ಸೇರಿದವನು

ನಾನು
ಯಾವ ಧರ್ಮದ ಪರವೂ ಇಲ್ಲಾ
ಎಲ್ಲಾ ಧರ್ಮದ ಜೀವದ ಪರ

ನಾನು
ಒಂದು ಧರ್ಮವೇ;
ಒಂದು ಗ್ರಂಥವೇ;
ಒಂದು ಭಾಷೆಯೇ;
ಒಬ್ಬ ದೊರೆಯೇ;
ಶ್ರೇಷ್ಠವೆಂಬ ಸಟೆಯನ್ನು
ಒಪ್ಪುವುದಿಲ್ಲಾ

ನಾನು
ಬ್ರಾಹ್ಮಣ್ಯವೇ ಯುಕ್ತಿ;
ಕ್ಷತ್ರಿಯವೇ ಶಕ್ತಿ;
ವೈಶ್ಯವೇ ವ್ಯವಹಾರ;
ಶೂದ್ರವೇ ಸೇವೆ;
-ವೆಂಬ ನನ್ನೊಳಗಿನ ‘ವರ್ಣ’ರಂಜಿತ
‘ಮನು’ವನ್ನು ಕೊಂದಿದ್ದೇನೆ

ನಾನು
ರಾಮನನ್ನು ನಂಬುವುದಿಲ್ಲಾ;
ಅಲ್ಲಾಹುನನ್ನು ನಂಬುವುದಿಲ್ಲಾ;
ಏಸುನನ್ನು ನಂಬುವುದಿಲ್ಲಾ;
ನಂಬಿರುವುದು ಶರಣನಾದ
ಜಲಗಾರನನ್ನೇ; ಎಲ್ಲರೂ ಅವನೇ

ನಾನು
ಈ ದೇಶದಲ್ಲಿಲ್ಲಾ:
ಆ ದೇಶದಲ್ಲಿಲ್ಲಾ;
ಇರುವ ನೆಲವೆ ಒಂದು ರಾಷ್ಟ್ರ,
ನುಡಿವ ನುಡಿಯೇ ರಾಷ್ಟ್ರಭಾಷೆ,
ಹಾಡುವ ಹಾಡೇ ರಾಷ್ಟ್ರಗೀತೆ,
ಉಡುವ ಅಂಗಿಯೇ ರಾಷ್ಟ್ರಬಾವುಟ

ನಾನು
ಗುಡಿ, ಚರ್ಚು, ಮಸೀದಿಗಳಲಿಲ್ಲಾ;
ಪಾರ್ಲಿಮೆಂಟಿನಲ್ಲಿಲ್ಲಾ;
ಜ್ಞಾನಿಯಲ್ಲಾ, ಜವಾನನಲ್ಲಾ,
ರೈತನಲ್ಲಾ, ಸೈನಿಕನಲ್ಲಾ;
ಎಲ್ಲರೊಳಗಿರುವ ಬುದ್ಧ

ಇಂದು
ನಾನು
ಬದುಕಿಲ್ಲಾ;
ಬದುಕಿದ್ದರೆ, ಪ್ರೀತಿಯಲ್ಲಿ ಮಾತ್ರ
ಸತ್ತರೆ, ಭೂಮಿಯೇ ರಣರಂಗ

ಇಂತಿ ನಿಮ್ಮ ನಾನು

ವಿಶ್ವಕೀರ್ತಿ ಎಸ್.
19.07.2018

 

Advertisements

ಮನಸ್ಸಿನ ಕೂಗು

ಕಣ್ಣಂಚಿನ ಹನಿಯು ಹೇಳುತಿದೆ
ನಾ ನಿನ್ನ ಕಂಡೆ ಎಂದು
ತುಟಿಯಂಚಿನ ನಗುವು ಹೇಳುತಿದೆ
ನಾ ನಿನ್ನ ಬಲ್ಲೆ ಎಂದು
ರಾತ್ರಿಯ ಕನಸೆಲ್ಲವೂ ಹೇಳುತಿದೆ
ನೀ ನನ್ನ ಕನಸು ಎಂದು
ಪ್ರತಿ ಹೃದಯದ ಬಡಿತ ಹೇಳುತಿದೆ
ನೀ ನನ್ನ ಜೀವ ಎಂದು
ನನ್ನ ಪ್ರೀತಿಯ ಮನಸ್ಸು
ಕೂಗಿ ಕೂಗಿ ಹೇಳುತಿದೆ
ಇಲ್ಲಿ ಯಾರು ಇಲ್ಲ ಎಂದು


ವಿಶ್ವಕೀರ್ತಿ ಎಸ್